319. fundur

1.

Ársreikningur Þingeyjarsveitar 2021: Fyrri umræða - 2204022

Ársreikningur Þingeyjarsveitar 2021 ásamt endurskoðunarskýrslu lagður fram til fyrri umræðu. Þorstein Þorsteinsson frá KPMG, endurskoðandi sveitarfélagsins, mætti til fundarins og fór yfir reikninginn. Einnig sat skrifstofustjóri fundinn undir þessum lið.

Rekstrarniðurstaða sveitarfélagsins í A og B hluta var neikvæð sem nam 17,8 m.kr. og rekstrarniðurstaða A hluta var neikvæð sem nam 21,4 m.kr. Samkvæmt fjárhagsáætlun 2021 með viðaukum var gert ráð fyrir 101,0 m.kr. neikvæðri rekstrarniðurstöðu A og B hluta. Frávikið er því 83,2 m.kr. hagstæðara en áætlað var.

Rekstrartekjur á árinu námu 1.304,5 m.kr. samkvæmt samanteknum ársreikningi fyrir A og B hluta, en þar af námu rekstrartekjur A hluta 1.252,3 m.kr. Samkvæmt fjárhagsáætlun 2021 með viðaukum var gert ráð fyrir rekstrartekjum sem næmu 1.218,9 m.kr. í A og B hluta. Rekstartekjur eru því 85,6 m.kr. hærri en áætlun gerði ráð fyrir eða sem nemur um 7 %.

Rekstrargjöld A og B hluta, þ.e. laun og launatengd gjöld og annar rekstrarkostnaður námu 1.237,0 m.kr. á árinu. Samkvæmt fjárhagsáætlun með viðaukum var gert ráð fyrir rekstrargjöldum sem næmu 1.242,3 m.kr. Laun og launatengd gjöld námu 798,5 m.kr. sem er 41,2 m.kr. hærra en áætlun gerði ráð fyrir en á móti er annar rekstrarkostnaður 46,4 m.kr. lægri en áætlun gerði ráð fyrir.

Samkvæmt sjóðsstreymisyfirliti ársins 2021 nam veltufé frá rekstri 33,0 m.kr. og handbært fé frá rekstri 31,7 m.kr. Fjárfestingar í varanlegum rekstrarfjármunum nam 74,3 m.kr. á árinu.

Eigið fé í árslok nam 278,1 m.kr. fyrir A og B hluta samanborið við 291,7 millj.kr. árið áður.

Eiginfjárhlutfall nemur 26,0 % í árslok. Skuldahlutfall sveitarfélagsins hækkar, er 60,7 % í A og B hluta í árslok 2021 en var 53,5 % í árslok 2020.

Ársreikningur 2021 kemur mun betur út en áætlun gerði ráð fyrir eða 83,2 m.kr. hagstæðari en áætlað var. Það skýrist fyrst og fremst af hærri tekjum og aðhaldi í rekstri. Meðvitað voru tekjur varlega áætlaðar fyrir árið 2021 vegna óvissu um hvað Covid faraldurinn gæti haft mikil áhrif en á sama tíma var stefnan að halda þjónustu óbreyttri, líkt og skólastarfsemi og helstu framkvæmdum gangandi. Launakostnaður í fræðslumálum fór þar af leiðandi fram úr áætlun en á móti var annar rekstrarkostnaður undir áætlun og þar með voru heildarútgjöld 2021 innan áætlunar. Áskoranir hafa verið margar síðast liðið ár og því afar ánægjulegt að ná þessum árangri. Það að lækka rekstrartapið svo um munar léttir rekstur sameinaðs sveitarfélags og eykur tækifæri til sóknar.

Sveitarstjórn þakkar starfsfólki sveitarfélagsins fyrir góð störf á erfiðum og krefjandi tímum. Einnig þakkar sveitarstjórn Þorsteini fyrir greinargóða yfirferð og vísar ársreikningi Þingeyjarsveitar 2021 til seinni umræðu í sveitarstjórn.

2.

Aurskriður í Útkinn - 2110014

Lagt fram bréf frá forsætisráðuneytinu, dags. 25.04.2022 um fjárveitingu vegna skriðufalla í Útkinn í október 2021.

Ríkisstjórnin samþykkti á fundi sínum þann 22. apríl s.l. tillögur fulltrúa forsætisráðuneytis, fjármála- og efnahagsráðuneytis, innviðaráðuneytis, dómsmálaráðuneytis, matvælaráðuneytis og umhverfis, orku- og loftlagsráðuneytis um sértækar aðgerðir af hálfu ríkisins vegna skriðufalla í Útkinn.

Annars vegar var ákveðið að matvælaráðuneytið óski eftir allt að 130 m.kr. framlagi úr almennum varasjóði fjárlaga sem veitt verði til Bjargráðasjóð. Fjármagninu verði varið til að mæta kostnaði af völdum skriðufallanna.

Hins vegar var ákveðið að innviðaráðuneytið óski eftir 30 m.kr. framlagi úr almennum varasjóði fjárlaga sem veitt verði til Þingeyjarsveitar. Fjármagnið standi straum af verkefnisstjórn vegna hreinsunar og almennum uppgræðslu- og landgræðsluverkefnum á svæðinu í samstarfi við heimamenn.

Sveitarstjórn þakkar ríkisstjórninni fyrir framlag til uppbyggingar vegna skriðufallanna í Útkinn. Styrkurinn skiptir miklu máli fyrir ábúendur á svæðinu og fyrir það gríðarstóra verkefni sem framundan er.
Þá hefur allur undirbúningur og samskipti sveitarfélagsins við fulltrúa ráðuneyta verið til fyrirmyndar og það ber að þakka. Sveitarstjórn felur sveitarstjóra að ráða verkefnastjóra í samráði við ábúendur og koma uppbyggingarverkefninu af stað.

Jóna Björg tók ekki þátt í afgreiðslu þessa liðar en óskar eftir að fá eftirfarandi bókað:

Ábúendur jarðanna í Kinn sem urðu fyrir skriðunum síðastliðið haust vilja koma á framfæri þökkum vegna þess mikla stuðnings sem sveitarfélagið hefur veitt í framhaldi af atburðunum. Sérstaklega þakka ábúendur sveitarstjóra fyrir þá miklu vinnu sem hún hefur unnið vegna hamfaranna.

3.

Sveitarstjórnarkosningar 2022: Kjörstjórnir - 2202029

Vegna vanhæfis fulltrúa í kjörstjórnum kýs sveitarstjórn að nýju eftirfarandi fulltrúa til setu í yfirkjörstjórn og undirkjörstjórn vegna sveitarstjórnarkosninganna 2022:
Tveir aðalmenn yfirkjörstjórnar hafa þegar verið skipaðir auk tveggja aðalmanna í undirkjörstjórn.

Yfirkjörstjórn
Tryggvi Þórhallsson, Dagný Pétursdóttir og Jón Þórólfsson.
Varamenn: Steinunn Ósk Stefánsdóttir, Jóhanna Njálsdóttir og Pétur Bergmann.

Undirkjörstjórn
Steinn Jóhann Jónsson, Katla Valdís Ólafsdóttir og Helga Sveinbjörnsdóttir.
Varamenn: Snorri Guðjón Sigurðsson, Aðalsteinn Már Þorsteinsson og Hanna Berglind Jónsdóttir.

Jóhanna Jóhannesdóttir mun annast utankjörfundaratkvæðagreiðslu á skrifstofum beggja sveitarfélaga. Hægt verður að kjósa utan kjörfundar á skrifstofum sveitarfélaganna eftirfarandi daga milli kl 13:00 og 15:00.
Skrifstofa Þingeyjarsveitar: 4., 6., 9., og 12. maí
Skrifstofa Skútustaðahrepps: 2., 5., 11., og 13. maí

Samþykkt samhljóða.

4.

Viðauki við fjárhagsáætlun 2022: Slökkvistöðin á Laugum - 2202008

Lögð fram kostnaðaráætlun vegna breytinga á slökkvistöðinni við Kvíhólsmýri á Laugum. Um er að ræða endurbætur á stiga og búningsaðstöðu.

Sveitarstjórn samþykkir samhljóða að farið verði í framkvæmdina á grundvelli fyrirliggjandi kostnaðaráætlunar en frestar gerð viðauka við fjárhagsáætlun.

5.

Fjölmenningarfulltrúi: Samningur við Norðurþing - 2204005

Lagt fram bréf frá Kristjáni Þór Magnússyni, sveitarstjóra í Norðurþingi, dags. 1.04.2022 þar sem hann tilkynnir breyttar forsendur á samningi milli sveitarfélaganna um fjölmenningarfulltrúa.

Þar sem forsendur samningsins eru það mikið breyttar samþykkir sveitarstjórn samhljóða að slíta samningnum. Sveitarstjórn leggur til við sveitarstjórn nýs sameinaðs sveitarfélags að ráðinn verði menningarfulltrúi sem fari með menningarmál í sameinuðu sveitarfélagi þar með talið málefni fjölmenninga, móttöku nýrra íbúa og móttöku flóttafólks.

6.

Fræðslunefnd: Fundargerðir - 1804052

Lögð fram fundargerðir 91. fundar Fræðslunefndar frá 25.04.2022. Margrét gerði grein fyrir fundargerðinni sem er í sex liðum.

Varðandi 4. lið fundargerðar samþykkir sveitarstjórn ósk skólastjóra til áramóta um að halda starfsmannafund einu sinni í mánuði og að leikskólinn loki þá daga kl. 15:00.

Sveitarstjórn staðfestir fundargerðina að öðru leyti.

7.

Skotfélag Húsavíkur: Styrkbeiðni - 2204025

Tekin fyrir beiðni Skotfélags Húsavíkur, dags. 10.04.2022, um styrk til áframhaldandi uppbyggingar á svæði félagsins. Styrkbeiðnin hljóðar uppá samning að upphæð 300.000 krónur árlega í þrjú ár.

Sveitarstjórn þakkar erindið og það metnaðarfulla starf sem unnið hefur verið á vettvangi félagsins. Í ljósi fyrirhugaðrar sameiningar Þingeyjarsveitar og Skútustaðahrepps sem tekur gildi þann 29. maí n.k. er því beint til Skotfélagsins að senda beiðni að kosningum loknum á sveitarstjórn hins sameinaða sveitarfélags.

8.

Urður, tengslanet kvenna: Styrkbeiðni - 2204026

Tekin fyrir beiðni frá Urði, tengslaneti kvenna í Þingeyjarsýslum, dags. 25.04.2022, um styrk að fjárhæð 60.000 kr. vegna heimsóknar í Þingeyjarsveit.

Tilgangur félagsins er að efla tengslanet kvenna á Norðausturlandi með því að sameina konur á svæðinu, efla samstarf og samstöðu. Þann 30. apríl ætla þær að heimsækja fyrirtæki í Þingeyjarsveit og kynna sér starfsemi þeirra sem fer þar fram.

Sveitarstjórn samþykkir samhljóða styrkbeiðnina sem rúmast innan fjárhagsáætlunar 2022.

9.

Einarsstaðir farmhouse: Umsögn vegna umsóknar um rekstrarleyfi - 2204023

Lögð fram umsagnarbeiðni frá sýslumanninum á Norðurlandi eystra, dags. 12.04.2022 þar sem Olga Marta Einarsdóttir sækir um rekstrarleyfi, flokkur II - Gististaður án veitinga, á Einarsstöðum 3 í Reykjadal í Þingeyjarsveit.

Sveitarstjórn gerir ekki athugasemdir við veitt rekstrarleyfi með fyrirvara um að jákvæðar umsagnir berist frá byggingarfulltrúa og heilbrigðis og eldvarnareftirlitinu, sbr. b-lið 7. gr. laga nr. 67/2016, um breytingu á lögum nr. 85/2007.

10.

Sparisjóður Suður-Þingeyinga: Aðalfundarboð 2022 - 2204018

Lagt fram aðalfundarboð Sparisjóðs Suður-Þingeyinga sem haldinn verður mánudaginn 2. maí á Fosshótel Húsavík.

Sveitarstjórn samþykkir samhljóða að Dagbjört Jónsdóttir, sveitarstjóri fari með umboð sveitarfélagsins á fundinum.

11.

Norðurorka hf.: Aðalfundarboð 2022 - 1903008

Lagt fram aðalfundarboð Norðurorku hf. sem haldinn var fimmtudaginn 31. mars s.l. Sveitarstjórn afgreiddi erindið í tölvupósti milli funda þann 27.04.2021 þar sem samþykkt var að Dagbjört Jónsdóttir, sveitarstjóri færi með umboð Þingeyjarsveitar á fundinum.

Sveitarstjórn staðfestir afgreiðsluna.

12.

Friðlýsing hraunhella í Þeistareykjahrauni: Skilmálar í kynningu - 2112013

Fyrir fundinum liggur auglýsing um friðlýsingu hellasvæða í Þeistareykjahrauni sem nú er í kynningu. Umhverfis- orku og loftlagsráðherra hefur, að tillögu Umhverfisstofnunar og Náttúrufræðistofnun Íslands og með samþykki Þingeyjarsveitar, sem einnig er landeigandi, ákveðið að friðlýsa hraunhella í Þeistareykjahrauni sem náttúruvætti í samræmi við 48. gr. laga nr. 60/2013 um náttúruvernd.

Sveitarstjórn gerir engar athugasemdir við fyrirliggjandi skilmála og leggur áherslu á að hefðbundnar nytjar verði óbreyttar frá því sem nú er.

13.

Umhverfisstofnun: Samstarf og samráð - 2204024

Fyrir fundinum liggja drög að samráðsáætlun um samstarfsverkefni Umhverfisstofnunar og Skútustaðahrepps. Áætlunin er í vinnslu en byggir á eftirfarandi markmiðum:

Markmið áætlunarinnar, eins og þau koma fyrir í drögunum, er auka yfirsýn yfir verkefni sem eru sameiginleg viðfangsefni stofnunarinnar og sveitarfélagsins og varða náttúruverndarsvæði í umsjá Umhverfisstofnunar í sveitarfélaginu, efla samstarf, auka upplýsingaflæði, leita skilvirkra lausna sem styðja vernd, verðmætasköpun og viðnámsþrótt svæðisins m.a. með því að greina sameiginlega tækifæri til að efla samfélag og náttúru.

Sveitarstjórn leggur til við sveitarstjórn nýs sameinaðs sveitarfélags að fyrirliggjandi samstarfsáætlun verði útfærð fyrir nýtt sveitarfélag.

14.

Vatnajökulsþjóðgarður: Fundargerð - 1810004

Fundargerð 89. fundar svæðisráðs norðursvæðis VJÞ.

Lögð fram til kynningar.

15.

Héraðsnefnd Þingeyinga: Fundargerð - 1804023

Fundargerð 28. fundar framkvæmdastjórnar HNÞ bs.

Lögð fram til kynningar.

16.

Undirbúningsstjórn vegna sameiningar: Fundargerð - 2109007

Fundargerð 9. fundar undirbúningsstjórnar vegna sameiningar Skútustaðahrepps og Þingeyjarsveita.

Lögð fram til kynningar.

17.

Markaðsstofa Norðurlands: Flugklasinn Air 66N - 1804011

Starf Flugklasans Air 66N, 27. okt. 2021 - 8. apríl 2022.

Lagt fram til kynningar.

18.

Stækkun Vatnajökulsþjóðgarðs: Verkefnalýsing á gerð viðauki við stjórnunar- og verndaráætlun ? Herðubreið og austurafrétt Bárðdæla - 2106035

Vinna er hafin við gerð stjórnunar- og verndaráætlunar Vatnajökulsþjóðgarðs fyrir þau svæði sem bæst hafa við á hálendi norðursvæðis undanfarin ár.

Lagt fram til kynningar.