316. fundur

Fundargerð

Sveitarstjórn Þingeyjarsveitar til 2022

17.03.2022

316. fundur

Sveitarstjórn Þingeyjarsveitar til 2022

haldinn í Kjarna fimmtudaginn 17. mars kl. 13:00

Fundarmenn

Margrét Bjarnadóttir, Árni Pétur Hilmarsson, Jóna Björg Hlöðversdóttir, Friðrika Sigurgeirsdóttir, Freydís Ingvarsdóttir, Einar Kristjánsson og Sigríður Hlynur Helguson Snæbjörnsson. 

Starfsmenn

Dagbjört Jónsdóttir, sveitarstjóri.

Fundargerð ritaði: Dagbjört Jónsdóttir, sveitarstjóri.

Í upphafi fundar óskaði varaoddviti eftir að bæta tveimur málum á dagskrá, annars vegar undir 7. lið; 1902020 - Framhaldsskólinn á Laugum: Umsögn vegna umsóknar um tækifærisleyfi og hins vegar undir 8. lið; 2203016 - Tónkvísl 2022: Styrkbeiðni. Aðrir liðir færast neðar á dagskrá sem því nemur.

Samþykkt samhljóða.

Dagskrá:

1.

Skipulags- og umhverfisnefnd: Fundargerð - 1804018

 

Lögð fram fundargerð 146. fundar Skipulags- og umhverfisnefndar frá 10.02.2022. Jóna Björg gerði grein fyrir fundargerðinni sem er í níu liðum.

 

2. liður fundargerðar; Breiðamýri læknishús, stækkun lóðar - 2202017
Sveitarstjórn samþykkir bókun skipulags- og umhverfisnefndar og felur byggingarfulltrúa að annast málsmeðferð vegna stofnun lóðarinnar eins og lög og reglugerðir mæla fyrir um.

7. liður fundargerðar; Efnistaka við Langavatn, framkvæmdaleyfi - 2203002
Sveitarstjórn samþykkir bókun skipulags- og umhverfisnefndar og felur skipulagsfulltrúa að gefa út framkvæmdaleyfi skv. reglugerð um framkvæmdaleyfi nr. 772/2012 og 13.-16. gr. skipulagslaga nr. 123/2010.

8. liður fundargerðar; Efnistaka úr Kambsáreyrum, framkvæmdaleyfi - 2203001
Sveitarstjórn samþykkir bókun skipulags- og umhverfisnefndar og felur skipulagsfulltrúa að gefa út framkvæmdaleyfi skv. reglugerð um framkvæmdaleyfi nr. 772/2012 og 13.-16. gr. skipulagslaga nr. 123/2010.

Fundargerðin staðfest að öðru leyti.

     

2.

Sveitarstjórnarkosningar 2022: Yfirkjörstjórn - 2202029

 

Lögð fram auglýsing innviðaráðuneytis dags. 3. mars 2022 um staðfestingu á sameiningu Skútustaðahrepps og Þingeyjarsveitar í eitt sveitarfélag. Auglýsingin mælir fyrir um að sveitarstjórnir sveitarfélaganna kjósi sameiginlega þrjá fulltrúa í yfirkjörstjórn og þrjá til vara. Kjörstjórnir þær sem kosnar voru í upphafi yfirstandandi kjörtímabils, skv. 14. gr. laga nr. 5/1998, um kosningar til sveitarstjórnar, skulu vera undirkjörstjórnir í hvoru sveitarfélagi fyrir sig við sveitarstjórnarkosningar.

 

Sveitarstjórn kýs til setu í yfirkjörstjórn vegna sveitarstjórnarkosninga 2022:

Bjarna Höskuldsson, Tryggva Þórhallsson og Dagnýju Pétursdóttur. Varamenn eru Sigrún Marinósdóttir, Ragnheiður Árnadóttir og Jón Þórólfsson.

Sveitarstjórn kýs til setu í undirkjörstjórn í Þingeyjarsveit vegna sveitarstjórnarkosninga 2022, sbr. einnig 2. mgr. 49. gr. sveitarstjórnarlaga:

Gísla Sigurðsson, Stein Jóhann Jónsson og Ólínu Arnkelsdóttur. Varamenn eru Mjöll Matthíasdóttir, Hávar Örn Sigtryggsson og Katla Valdís Ólafsdóttir.

     

3.

N4 ehf.: Samstarf ellefu sveitarfélaga á Norðurlandi eystra: Kostnaðarskipting - 2201005

 

Lagt fram bréf frá Eyþóri Björnssyni f.h. SSNE, dags. 24.02.2022 um samstarf sveitarfélaga innan SSNE og N4, ásamt kostnaðarskiptingu í framhaldi af bréfi sem framkvæmdastjóri N4 sendi sveitarfélögum þann 17. desember s.l.
Í bréfinu er kynnt tillaga að samkomulagi sveitarfélaga á Norðurlandi eystra og N4 um kynningarmál. Einnig lögð fram drög að samkomulagi milli SSNE f.h. 12 sveitarfélaga á Norðurlandi eystra og N4 ehf. vegna þáttagerðar og sýninga á miðlum N4 árið 2022.

 

Sveitarstjórn samþykkir að Þingeyjarsveit taki þátt í samstarfinu á þeim grunni sem lagt er til í bréfi SSNE. Sveitarstjóra falið að vinna málið áfram.

     

4.

KPMG ehf. - Stjórnsýsluskoðun 2021 - 1901046

 

Lögð fram skýrsla frá KPMG um stjórnsýsluskoðun Þingeyjarsveitar 2021. Samhliða vinnu við endurskoðun ársreiknings fyrir árið 2021 hefur verið kannað hvort almenn stjórnsýsla sveitarfélagsins og einstakar ákvarðanir af hálfu þess séu í samræmi við reglur um fjármál sveitarfélaga, ábyrga fjármálastjórn og upplýsingaskyldu sveitarfélaga, sbr. 3. mgr. 72. gr. sveitarstjórnarlaga nr. 138/2011.

 

Sveitarstjórn staðfestir fyrirliggjandi skýrslu.

     

5.

Lionsumdæmið á Íslandi: Styrkbeiðni - 2202032

 

Lagt fram bréf frá Þorkeli Cýrussyni, fjölumdæmastjóra Lions og Sigþóri U. Hallfreðssyni, formanni Blindrafélagsins, dags. 23.02.2022. Lionshreyfingin og Blindrafélagið hafa tekið höndum saman um átak til að tryggja framboð af leiðsöguhundum í landinu til nýrra notenda og til endurnýjunar þeirra hunda sem nú þegar eru til staðar. Óskað er eftir fjárframlagi frá sveitarfélaginu til fyrsta hluta verkefnisins.

 

Sveitarstjórn samþykkir styrk að upphæð 50.000 kr. sem rúmast innan fjárhagsáætlunar 2022.

     

6.

Ályktun um innrás Rússa í Úkraínu - 2203008

 

Sveitarstjórn Þingeyjarsveitar fordæmir harðlega innrás Rússa í Úkraínu.

 

Sveitarstjórn lýsir sig reiðubúna til þátttöku í samstarfsverkefni um móttöku flóttafólks og felur sveitarstjóra að vinna að undirbúningi málsins fyrir hönd sveitarfélagsins.
Sveitarstjórn vill hvetja íbúa sveitarfélagsins sem hafa húsnæði aflögu að skrá það hjá Fjölmenningarsetri www.mcc.is

     

7.

Framhaldsskólinn á Laugum - Umsögn vegna umsóknar um tækifærisleyfi - 1902020

 

Lögð fram umsagnarbeiðni frá sýslumanninum á Norðurlandi eystra dags. 10.03.2022 þar sem Andri Hnikarr Jónsson, forsvarsmaður, sækir um tækifærisleyfi vegna Tónkvíslar - Söngkeppni Framhaldsskólans á Laugum í íþróttahúsinu á Laugum í Þingeyjarsveit.

 

Sveitarstjórn gerir ekki athugasemdir við veitt tækifærisleyfi með fyrirvara um að jákvæðar umsagnir berist frá byggingarfulltrúa og heilbrigðis og eldvarnareftirlitinu, sbr. b-lið 7. gr. laga nr. 67/2016, um breytingu á lögum nr. 85/2007.

     

8.

Tónkvísl 2022; Styrkbeiðni - 2203016

 

Lagt fram bréf frá nemendafélagi Framhaldsskólans á Laugum þar sem óskað er eftir styrk að fjárhæð 500 þús.kr. vegna Tónkvíslar 2022.

 

Sveitarstjórn samþykkir styrk til verkefnisins að fjárhæð 500 þús.kr. og samþykkir þá upphæð sem viðauka við fjárhagsáætlun 2022 sem mætt verður með handbæru fé.

     

9.

Samband íslenskra sveitarfélaga: Fundargerð - 1804006

 

Fundargerð 907. fundar stjórana Sambands íslenskra sveitarfélaga.

 

Lögð fram til kynningar.

     

10.

Samráðs- og upplýsingafundur til undirbúnings stefnumótunarvinnu á landsþingi sambandsins í september 2022 - 2203007

 

Bréf frá Sambandi íslenskra sveitarfélaga dags. 21.02.2022.

 

Lagt fram til kynningar.

     

11.

Auglýsing eftir framboðum í stjórn Lánasjóðs sveitarfélaga - 2203006

 

Bréf frá Lánasjóði sveitarfélaga dags. 11.02.2022.

 

Lagt fram til kynningar.

     

Fundi slitið kl. 15:51