Upplýsingafulltrúi ferðamála á Fosshóli.

Ferðamálsamtök Þingeyjarsveitar hafa ráðið Svein Garðarsson í  starf upplýsingafulltrúa ferðamála í Þingeyjarsveit.

Sveinn hefur aðsetur í versluninni á  Fosshóli við Goðafoss og verður upplýsingaskrifstofan opin frá  kl. 09-14,  meðan þessi þjónusta er í mótun.

Sími upplýsingafulltrúa er 464-3400

Netfang er info@thingeyjarsveit.is

Fróðleikur og ljósmyndir úr Þingeyjarsveit hinni fögru!

Hér fer á eftir greinargóð samantekt unnin af Önnu Maríu Þórhallsdóttur frá Landamótsseli í Kaldakinn. Ljósmyndir tóku þeir Símon Sverrisson frá Hólum og Trausti Dagsson frá Breiðanesi, báðir úr Reykjadal, sumarið 2004. Viðbót vegna sameiningar Aðaldals við Þingeyjarsveit 2008 auk nokkurra lagfæringa og viðbótar vegna breyttra aðstæðna heftur unnið Helga Arnheiður Erlingsdóttir og einnig hefur hún látið í té nokkrar ljósmyndir.

Myndasíða: Smellið hér til að fara á sérstaka myndasíðu Trausta og Símons með mörg hundruð myndum og ýmsum upplýsingum.

Kynningarbælingur 2005: Smellið hér til að skoða kynningarbækling um Þingeyjarsveit fyrir ferðamenn.

Gaman í Breiðumýri! Ljósm.: Símon Sverrisson.

Allar athugasemdir  eru vel þegnar: Þær má senda á netfangið thingeyjarsveit@thingeyjarsveit.is.  

Þingeyjarsveit lituð bláu.

Upplýsingaskrifstofa er starfrækt að sumarlagi fyrir ferðamenn í Þingeyjarsveit á Fosshóli við Goðafoss.

Benda má á ýmsar síður hér á heimasíðu sveitarfélagsins sem endurspegla fjölþætta þjónustu við ferðamenn. Veljið með því að renna bendlinum yfir tengilinn Þingeyjarsveit vinstra megin efst á síðunni.

Gáfulegur Geithafur á Rauðá í mynni Bárðardals. Ljósm.: Símon Sverrisson.

Ferðaþjónusta gegnir stóru hlutverki í Þingeyjarsveit enda svæðið þekkt fyrir fjölmargar náttúruperlur. Marga sögufræga staði er þar einnig að finna enda sveitin eitt aðalsögusvið landafunda og kristnitöku á Íslandi.

Ferðalangur. Ljósm.: Símon Sverrisson.

Þingeyjarsveit spannar stórt svæði, er um 5.000 km², nær frá Vaðlaheiði í vestri til Mývatnsheiðar í austri og frá Flatey í norðri og allt suður á Grímsvötnum á Vatnajökli.

Ferðalangur. Ljósm.: Trausti Dagsson.

Komið er inn í Þingeyjarsveit að vestan, á miðju Víkurskarði þegar ekið er niður í Fnjóskadal. Fnjóskadalur er um 40 km langur, og eftir honum endilöngum rennur Fnjóská, lengsta bergvatnsá landsins.

Gamla bogabrúin yfir Fnjóská. Ljósm.: Trausti Dagsson.

Eyðibyggðir út af Fnjóskadal njóta sífellt meiri vinsælda ferðamanna, þær eru Bleiksmýrardalur, Hjaltadalur og Timburvalladalur í suðri en Flateyjardalsheiði, Flateyjardalur og Flatey í norðri (sjá vef um Flatey: http://www.isholf.is/flatey/ og www.gentlegiants.is.)

Flateyjardalur er tiltölulega gróinn, þó nokkuð sé um melhjalla í hlíðum. Skógur er víða í Fnjóskadal og þar er að finna annan stærsta skóg landsins, Vaglaskóg.

Ljósavatnsskarð. Ljósm.: Trausti Dagsson

Ljósavatnsskarð gengur austur úr Fnjóskadal og tengir hann við Bárðadal og Kaldakinn. Ljósavatn er stórt stöðuvatn, 3,2 km², í mynni skarðsins að austan. Þingmannalækur rennur um Ljósavatnsskarð í Fnjóská. Einnig Djúpá í austur og síðan norður og fellur í Skjálfandafljót austanvert við Kinnarfellið.

Í fjöru í Út-Kinn norðan Bjarga. Ljósm.: Trausti Dagsson.

Kaldakinn nefnist byggðin norður frá Ljósavatnsskarði, vestan Skjálfandafljóts til sjávar, undir hlíðarbröttum Kinnarfjöllum. Nyrst eru Náttfaravíkur, þar er land stórbrotið og hrikalegt en gróður víða mikill og fagur. Þar settist að einn af mönnum Garðars Svavarssonar sem fyrstur manna hafði vetursetu á Íslandi. Náttfari dvaldi í víkunum um hríð eftir að bátur hans "slitnaði" frá skipi Garðars. Hlýtur Náttfari að teljast fyrstur landnámsmanna á Íslandi.

Rætur Kinnarfells eru aðeins norðan við mynni Ljósavatnsskarðs og liggur það áfram norður fram í miðja sveit. Skjálfandafljót rennur austan megin við fellið og þar, gegnt Fellsskógi, er Þingey, forn þingstaður. Draga Þingeyjarsýslur sem og sveitarfélagið nafn sitt af eynni.

Goðafoss. Ljósm.: Símon Sverrisson

Þekktastur fossa í Skjálfandafljóti er Goðafoss, einn af þremur stærstu fossum landsins. Talið er að Þorgeir Ljósvetningagoði hafi kastað goðum sínum í fossinn eftir kristnitökuna árið 1000. Fossinn er steinsnar frá þjóðvegi nr. 1, rétt hjá Fosshóli í mynni Bárðardals. Fleiri fossar eru í fljótinu norðan Goðafoss, s.s. Barnafoss og Ullarfoss.

Litlutungurétt í Bárðardal. Ljósm.: Trausti Dagsson.

Bárðardalur er einn af lengstu byggðu dölum landsins, um 45 km að lengd, og liggur beggja vegna Skjálfandafljóts, frá Goðafossi að Aldeyjarfossi. Dalurinn er fremur þröngur og grunnur, með grónum og klettalausum en bröttum hlíðum.

Aldeyjarfoss. Ljósm.: Símon Sverrison.

Aldeyjarfoss er fagur foss í sérkennilegu umhverfi stuðlabergssúlna og skessukatla.

Hrafnabjargafossar. Ljósm.: Símon Sverrisson.

Hann er vestan megin í dalnum, um einn kílómetra sunnan við Mýri, við upphaf Sprengisandsleiðar. Litlu ofar við Aldeyjarfoss er Ingvararfoss og enn ofar Hrafnabjargafossar.

Kvöldsól - norður Reykjadal, Kinnarfjöll. Ljósm.: Símon Sverrisson.

Austan Fljótsheiðar og suður af Aðaldal, liggur Reykjadalur. Sveitarfélagamörk við Aðdælahrepp [voru] við Vestmannsvatn. Dalurinn er allbreiður yst en þrengist við Breiðamýri með Fljótsheiði að vestan og Laxárdals- og Mývatnsheiðar að austan. Þar eru hreppamörk við Skútustaðahrepp. Reykjadalurinn er grösugur vel og allþéttbýll og rennur Reykjadalsá um hann endilangan.

Framhaldsskólinn á Laugum - Fosshótel. Ljósm.: Símon Sverrisson.

Laugar eru þéttbýliskjarni í Reykjadal þar sem búa um 100 manns. Á Laugum er framhaldsskóli og helsta þjónustusvæði sveitarfélagsins. Þar er m.a. fiskþurrkunnarfyrirtækið Laugarfiskur hf. sem sér um að þurrka hausa og hryggi og selja á Nígeríumarkað. Þykir jafnan allsérstakt að svo stórt sjávarútvegsfyrirtæki sé staðsett inn í miðju landi, en nægt heitt vatn er á staðnum sem notað er við þurrkunina. Á Laugum er skólasetur sem einmitt var valinn staður með tilliti til uppsprettu heita vatnsins. Þar eru einnig verslun, sparisjóður, póstafgreiðsla og verkstæði svo eitthvað sé nefnt.

Þverá í Laxárdal. Ljósm.: Símon Sverrisson.

Laxárdalur er um 27 km langur, austan Reykjadals, og nær frá Brúum að Helluvaði. Dalurinn er rómaður fyrir náttúrufegurð. Hann er vel gróinn og um hann rennur Laxá niður Laxárgljúfur í Aðaldal.

Á Þverá í Laxárdal er að finna einna heildstæðustu búsetuminjar á landinu. Þar hefur varðveist mjög merkilegur torfbær sem og útihús af fornri gerð. Þar var Kaupfélag Þingeyinga stofnað árið 1882.

Sameining Þingeyjarsveitar og Aðaldælahrepps.

Aðaldalur - Kinnarfjöll í baksýn

Árið 2008 sameinuðust sveitarfélögin Aðaldælahreppur og Þingeyjarsveit undir nafni Þingeyjarsveitar.  Þingeyjarsveit liggur því áfram norður frá Vestmannsvatni, Múlaheiði og Laxárdal að sunnan þar  sem áður voru hreppamörk Aðaldælahrepps og Þingeyjarsveitar (áður Reykdælahrepps) allt norður að Skjálfandaflóa. Austurmörkin eru um Hvammsheiði.  Að vestan voru mörkin áður við Skjálfandafljót sbr. lýsingu að hreppamörkum hér að framan, en nú er Skjálfandafljót ekki lengur hreppamörk heldur í miðri Þingeyjarsveit. Syðstu bæir í Reykjahverfi tilheyrðu Aðaldælahreppi nú  Þingeyjarsveit.

                           . 

Aðaldalshraun

Nyðri hluti Aðaldals er mikið til  hraun og sandar.  Bæir standa þétt á köflum en annars staðar er dreifðari byggð, má segja að byggðin markist af hrauninu. Aðaldalshraun er um 100 km2 og þekur dalbotninn að stórum hluta.  Það er raunar tvö hraun, sem bæði runnu úr Mývatnssveit, úr Ketildyngju fyrir uþb. 3500 árum og úr Þrengslaborgum um 2000 ára gamalt.  Hraunið er nú víða gróið birki og lyngi. 

Laxá fellur úr Mývatnssveit um Laxárdal og Aðaldal til Skjálfandaflóa.  Laxá er kunn fyrir góða veiði og mikla náttúrufegurð..  Eyvindarlækur fellur úr Vestmannsvatni í Laxá, þar er friðlýst votlendissvæði.

Við Laxárvirkjun 

Þéttbýli er við Hafralækjarskóla, sem er í miðjum Aðaldal og við Laxárvirkjun.   Laxárgljúfur gengur fram úr Laxárdal  á mörkum Laxárdals og Aðaldals.  Neðst í því er Laxárvirkjun.

Áhugaverðir staðir

Vaglaskógur: Er annar stærsti skógur á landinu og einnig með stórvöxnustu skógum landsins, en þar ná birkitré yfir 13 m. Þar er miðstöð Skógræktar ríkisins á Norðurlandi eystra og stór uppeldisstöð fyrir trjáplöntur. Vaglaskógur er einn af fáum íslenskum skógum þar sem skógarhögg er stundað og eru afurðir þess einkum notaðar í reykinga-og arinvið. Vaglaskógur er vinsæll áningastaður ferðafólks enda afbragðs útivistarsvæði fyrir alla fjölskylduna. Hann hefur orðið skáldum yrkisefni, t.d. Kristjáni frá Djúpalæk sem orti svo:

Kvöldið er okkar

Kvöldið er okkar og vor um Vaglaskóg,
við skulum tjalda í grænum berjamó.
Leiddu mig vinur í lundinn frá í gær,
lindin þar niðar og birkihríslan grær.
Leikur í ljósum

lokkum og angandi rósum,
leikur í ljósum

lokkum hinn fagnandi blær.

Daggperlur glitra um dalinn færist ró,
draumar þess rætast sem gistir Vaglaskóg.
Kveldrauðu skini á krækilyngið slær.
Kyrrðin er friðandi, mild og angurvær.
Leikur í ljósum

lokkum og angandi rósum,
leikur í ljósum

lokkum hinn þaggandi blær.

Og Davíð Stefánsson heillaðist einnig af þessum fallega stað og orti ljóð til skógarins:

Í Vaglaskógi

Ég var í Vaglaskógi,

í vorsins græna ríki,

og þar er alltaf ilmur,

þó aðrir skógar svíki.

Ég varð að villimanni,

sem vorsins söngva nýtur

og elskar grænar greinar

og guði einum lýtur.

Ég var í Vaglaskógi,

og vorið hló í kvistum.

Ég drakk af djúpum skálum

þá dögg, er svalar þyrstum.

Um loftið þrestir þutu,

og þá var margt, sem skeði.

Þar logar allt af lífi.

Þar ljómar allt af gleði.

Er sólin boðar sumar

um sveit og fjöll og voga

og blóm og bjarkakrónur

sem brúðarkyndlar loga

og allar elfur syngja

um ást og bjartar nætur,

þá breytast mennskar meyjar

í mildar skógardætur.

Ég var í Vaglaskógi,

og veit af lundi einum;

þar ríkir rökkrið helga;

þar rignir óskasteinum;

þar glitrar allt af gleði,

og góðir vinir mætast,

og þar lét drottning dagsins

minn draum og vonir rætast.

Þar batt ég brúðarsveiginn

og brjóstið heita kyssti.

Á bjarkarstofninn sterka

ég stafi okkar risti ...

Og allt er ilmi vafið,

og allar greinar hjala

og mæla á því máli,

sem minningarnar tala.

Ég verð að villimanni,

er vorsins klukkur hringja.

Ég fagna eins og fuglinn,

sem fæðist til að syngja.

Þar falla af mér fjötrar,

er fyrstu laufin gróa,

og ég verð ör og ungur

af ilmi grænna skóga.

Flateyjardalsheiði og Flateyjardalur: Eyðidalur norður af Fnjóskadal við Dalsmynni, um 32 km langur og nær að sjó til móts við Flatey á Skjálfanda. Flateyjardalsheiði og Flateyjardalur eru raunverulega sami dalurinn, heiðin liggur þó nokkuð hærra en dalurinn en nyrst í honum, við sjóinn, er all breitt undirlendi. Bæði heiðin og dalurinn voru byggð hér á árum áður en síðasti bærinn, Brettingsstaðir, fóru í eyði árið 1954.

Mjög sumarfagurt þykir á Flateyjardal þó vetrarríki sé mikið á þessum slóðum, enda hefur ásókn ferðamanna aukist þangað jafnt ár frá ári. Leiðin inn á dalinn liggur rétt sunnan við bæinn Þverá í Dalsmynni en hún er eingöngu fær á sumrin og þá bara jeppum og stærri bílum.

Flatey á Skjálfanda: Er u.þ.b. 2,5 km löng þar sem hún er lengst og um 2 km á breidd þar sem hún er breiðust. Eyjan stendur á mjög virku jarðskjálftabelti. Ljóst er af heimildum að byggð hefur verið samfelld í Flatey allt frá 12. öld til ársins 1967 þegar allir íbúar í eynni, um 50 manns, fluttust brott. Flestir urðu íbúarnir árið 1943, en þá voru um 120 manns í Flatey. Alla tíð voru fiskveiðar aðal bjargræðisvegur eyjamanna, þó landbúnaður, og síðar fleiri atvinnuvegir, væru stundaðir jafnhliða. Þrátt fyrir að Flatey hafi nú verið í eyði um margra áratugaskeið eru margir sem sækja þangað á sumrin til dvalar og sumir nýta hlunnindi og sækja sjóinn. Theódór Friðrikson (1876-1948), rithöfundur, fæddist í Flatey. Hann skrifaði margar bækur, m.a. ævisögu sína “Í verum I-II”, en hún er áhugaverð fyrir þá sem vilja kynna sér lífskilyrði á þessum slóðum um og upp úr aldamótum 1900. Hægt er að komast út í Flatey með Norðursiglingu á Húsavík, þó einkum fyrir stærri hópa (464-2350).

Náttfaravíkur:Liggja undir Víknarfjöllum við Skjálfandaflóa, nyrst í Köldukinn. Landnáma hermir svo frá að frá skipi Garðars Svavarssonar, sem hafði vetursetu á Húsavík í för sinni til Íslands, hafi slitnað bátur sem í voru þræll að nafni Náttfari og ónefnd ambátt. Settust þau að í víkunum um skeið og draga þær nafn sitt af því. Eignaði svo Náttfari sér land í Reykjadal en hraktist aftur út í Víkur þegar land byggðist.

Þrír bæir voru í Náttfaravíkum, yst Vargsnes, þá Naustavík og suður í Kotadalnum bærinn Kotmýrar. Byggð hélst í Náttfaravíkum fram á síðustu öld en Naustavík fór síðust í eyði árið 1941. Þar stendur enn steinhús sem notað er sem sæluhús. Sjá http://www.isholf.is/flatey/.

Barnafoss í Skjálfandafljóti: Er austan megin Kinnarfells gegnt eyðijörðinni Barnafelli, 3-4 km norður af Fremstafelli. Þar fellur fljótið í þröngu og allt að 100 m djúpu gljúfri. Nafngift fossins er sögð dregin af því að börn hafi eitt sinn verið að leik í tunnu skammt frá fossinum og hafi tunnan oltið með þau ofan í gljúfrið og þau farist.

Frá Fremstafelli liggur slóði að Barnafossi sem er fær öllum stærri fólksbílum og jeppum á sumrin.

Barnafoss - Þingey handan fossins. Ljósmynd  Helga A. Erlingsdóttir

Þingey: Eyja í Skjálfandafljóti norðaustur af Barnafossi. Þar var þingstaður til forna og þar haldið þing á hverju vori. Þingey var líklega þingstaður frá árinu 963. Eyjan er nær 6 km löng en austur úr eynni gengur breiðvaxið nes þar sem hinn eiginlegur þingstaður var. Þar heitir Þinghóll og mótar þar greinilega fyrir miklum búðum og hringlaga garði um þær. Draga Þingeyjarsýslur sem og Þingeyjarsveit nafn sitt af eynni.

Ullarfoss í Skjálfandafljóti: Fellur fram af Þingey í Skipapoll, en þangað segir sagan að Bárður landnámsmaður hafi dregið skip sitt.

Fellsskógur: Fallegt skóglendi í austurhlíð Kinnarfells. Þaðan er fallegt útsýni yfir Þingeyjardalinn, Skipapoll, Ullarfoss, eyrar og kvíslar Skjálfandafljóts og norðaustur yfir hérað. Akfært er þangað ef þurrt er, en afleggjari liggur frá þjóðveginum gegnt Ljósvetningabúð.

Hrifla: Bær vestan Skjálfandafljóts. Þar fæddist Jónas Jónsson (1885-1968) skólastjóri og ráðherra, betur þekktur sem Jónas frá Hriflu.

Goðafoss í Skjálfandafljóti: Þykir einn fegursti foss landsins og er aðeins örfáa metra frá þjóðvegi nr. 1, rétt hjá Fosshóli við mynni Bárðardals. Hann er bæði breiður og vatnsmikill og hefur fljótið grafið næstum þriggja km langt gljúfur inn í hraunið við fossinn og er það tilkomumikil sjón að sjá fljótið falla ólgandi niður þröngt gljúfrið. Klettar á fossbrúnni greina hann í tvo meginfossa, 9 og 17 m háa, og nokkra smærri eftir vatnsmagni. Sagan segir að Þorgeir Ljósvetningagoði hafi kastað goðum sínum í fossinn eftir að kristni var lögtekin árið 1000 og fossinn fengið nafn sitt af því.

Skammt neðan við Goðafoss er annar lítill foss er nefnist Geitafoss og þar rétt vestan við sérkennilegt gat í bergið, svokallað Hansengat. Dregur það nafn sitt af því að í það féll Hansen, lyfsali á Akureyri, er hann hugðist stökkva yfir gatið. Sakaði hann þó ekki en Kristján fjallaskáld orti um atburðinn og nefndi ljóð sitt “Undirheimaförin” sem hefst þannig:

Goðafoss í gljúfrasal

glymur fram í Bárðardal,

kveðr hann þar í klettaþröng

kuldalegan voðasöng.

Ísgrátt berg er allt um kring,

oft þar settu hrafnar þing.

Margur þangað maður fer,

mikið þegar um dýrðir er,

heimsins öllum áttum frá,

undur þetta til að sjá.

Gefst þar oft á góðu völ,

gumnar drekka ljúffengt öl.

...

Nokkrir hellar eru í berginu niðri við fljótið. Einn þessara hella ber nafnið Sölvahellir en sagan segir að í þeim helli hafi útlægur ræningi, er Sölvi hét, hafst við um tíma áður en hann fannst og var drepinn.

Halldórsstaðaskógur: Er víðáttumestur skóga í Bárðardal og er á nokkuð flötu landi milli Mýrar og Halldórsstaða, vestan megin í dalnum. Þar hefur verið útbúið samkomusvæði og göngustígar eru nokkrir. Skógurinn er opinn öllum en þó er bannað að tjalda þar.

Aldeyjarfoss í Skjálfandafljóti: Er fagur foss í sérkennilegu umhverfi stuðlabergssúlna og skessukatla. Hann er nokkru fyrir sunnan Mýri, vestan megin í Bárðadal, við Sprengisandsleið. Um 500 m fyrir ofan Aldeyjarfoss er Ingvararfoss og þar enn ofar eru Hrafnabjargafossar.

Mjóidalur: Eyðidalur inn af Bárðardal sunnan við Mýri. Þar var áður einn bær samnefndur sem fór í eyði árið 1894. Var það síðasta heimili Stephan G. Stephanssonar, skálds, á Íslandi.

Skammt sunnan brúarinnar á Mjóadalsá er forn fjárrétt, Litlutungurétt. Líklegt þykir að elsti hluti hennar sé frá landnámsöld. Réttin var síðast notuð sem skilarétt árið 1947, en rúið í henni geldfé allt til 1960.

Ullarfoss í Svartá: Lágur en fallegur foss sem sést vel frá veginum að Stórutungu, austan megin í dalnum.

Laugar: Þéttbýliskjarni í Reykjadal þar sem búa um 100 manns. Þar er helsta þjónustusvæði sveitarfélagsins. Staðurinn er gamalt skóla-og menningarsetur. Byrjað var að reisa alþýðuskóla á Laugum árið 1924, er síðar varð héraðsskóli, og árið 1928 var þar einnig reistur húsmæðraskóli. Framhaldsskóli var svo stofnaður árið 1988 með sameiningu héraðsskólans og húsmæðraskólans. Á Laugum eru einnig leik-, grunn- og tónlistarskóli.

Sigurjón Friðjónsson skáld (1867-1950) bjó lengi á Litlu-Laugum.

Altaristaflan í Þverárkirkju. Ljósm.: Símon Sverrisson.

Þverá í Laxárdal: Þar hefur varðveist mjög merkilegur torfbær sem og úthús af fornri gerð og eru þetta taldar einna heildstæðustu búsetuminjar á landinu öllu. Í elsta hluta bæjarhúsanna er stofan þar sem fyrsta kaupfélag á Íslandi, Kaupfélag Þingeyinga, var stofnað árið 1882. Stofan, sem byggð var 1849, var flutt og endurreist á safnsvæði Safnahússins á Húsavík, á árunum 1994-1996, þar sem hún er til sýnis fyrir almenning. Kirkjan á Þverá er úr höggnum steini og var reist af Jóni Jóakimssyni, bónda á Þverá, árið 1878. Arngrímur Gíslason málaði altaristöfluna.

Gisting

Draflastaðir. Ljósm.: Trausti Dagsson.

Draflastaðir: Gisting á fallegum stað í Fnjóskadal, nærri þjóðvegi 1. Sími 461 1726. Netfang: siddi@sveitasetrid.is.

Frá Illugastöðum. Ljósm.: Trausti Dagsson.

Illugastaðir: Eru í innanverðum Fnjóskadal, um 18 km frá Fnjóskárbrú. Þar er orlofsbyggð verkalýðsfélaganna, 31 hús, og er opið allt árið. Á sumrin er þar starfrækt verslun og boðið upp á ýmsa afþreyingu s.s. sundlaug, heitan pott og minigolf. Góð fundaraðstaða er í salnum og á staðnum eru seld veiðileyfi efst í Fnjóská.

Nánari upplýsingar í síma 462-6199.

Netfang: hlif@est.is

Sundlaugin og leiksvæði á Illugastöðum. Ljósm.: Símon Sverrisson.

Vaglaskógur: Í Vaglaskógi eru rekin vönduð tjaldsvæði og kjósa margir að eiga tjaldhýsi eða hjólhýsi sumarlangt á föstum svæðum í skóginum. Þar er heitt og kalt vatn, hægt að komast í rafmagn og góð klósett og sturtuaðstaða fyrir alla, einnig fatlaða. Merktar göguleiðir eru í skóginum og margir áhugaverðir skoðunarstaðir, s.s. trjásafn. Lítil verslun er á staðnum þar sem seldar eru helstu nauðsynjavörur, hún er opin alla daga yfir sumartímann.

Bjarmavöllur: Íþróttavöllur ungmennafélagsins Bjarma í Fnjóskadal. Völlurinn er leigður út sem tjaldstæði á sumrin fyrir stærri hópa, s.s. ættarmót. Þar er mjög góð aðstaða, bæði wc og sturtur á staðnum.

Nánari upplýsingar í síma 462-6974.

Hjarðarholt: Er vestan megin Fnjóskár, farið inn veg 834 til norðurs rétt neðan við Víkurskarð. Í Hjarðarholti er boðið upp á gistiaðstöðu í heimahúsi sem og kvöldverð/morgunverð ef óskað er. Einnig eru tjaldstæði á staðnum með snyrtiaðstöðu.

Nánari upplýsingar í síma 462-6914.

Netfang: jonferd@binet.is

Sigríðarstaðir: Eru í Ljósavatnsskarði. Þar eru leigð út tjaldstæði með snyrtiaðstöðu. Tjaldstæðin eru skemmtilega staðsett og mjög vinsæl fyrir ættarmót og stærri hópa.

Nánari upplýsingar í síma 462-6731.

Netfang: hermann1@mi.is

Stórutjarnaskóli - Hótel Edda. Ljósm.: Trausti Dagsson.

Hótel Edda Stórutjörnum: Stórutjarnaskóli er í miðju Ljósavatnsskarði. Þar er starfrækt Eddu-hótel á sumrin og boðið upp á gistingu í herbergjum með baði eða án sem og í svefnpokaplássi. Yfir sumartímann er þar einnig opinn veitingasalur þar sem boðið er upp á fjölbreyttan matseðil. Á Stórutjörnum er sundlaug og heitur pottur.

Nánari upplýsingar í síma 444-4890.

Netfang: storutjarnir@hoteledda.is

Heimasíða: www.hoteledda.is 

Stórutjarnaskóli býður einnig upp á aðstöðu um helgar yfir vetramánuðina til ráðstefnuhalds, fundahalda o.fl., þar sem hægt er að fá gistingu. Einnig er hægt að kaupa veitingar fyrir hópa.

Nánari upplýsingar í síma 464-3220.

Netfang: oliarn@storutjarnaskoli.is

Ljósvetningabúð: Félagsheimilið Ljósvetningabúð í Köldukinn er leigt út sem svefnpokapláss fyrir hópa á sumrin. Eldhús og öll snyrtiaðstaða er á staðnum.

Nánari upplýsingar í síma: 464-3231.

Fosshóll: Á Fosshóli við Goðafoss er rekið gisti-og veitingahús. Þar er boðið upp á gistingu í uppbúnum rúmum en einnig er hægt að leigja tjaldstæði á staðnum. Á Fosshóli er líka rekin verslun og bensínsala sem opin er allt árið.

Nánari upplýsingar í síma: 464-3108.

Netfang: fossholl@nett.is

Kiðagil - hótel og skólabúðir. Ljósm.: Trausti Dagsson.

Kiðagil: Hjá Stóruvöllum, í vestanverðum Bárðardal, er félagsheimili og fyrrum barnaskóli. Þar er rekin gisti-og greiðasala á sumrin. Boðið er upp á gistingu í uppbúnum rúmum, svefnpokapláss og tjaldstæði. Einnig er veitingasalur opinn allan daginn og kaffihlaðborð á hverjum sunnudegi.

Nánari upplýsingar í síma: 464-3290.

Netfang: kidagil@kidagil.is

Heimasíða: www.kidagil.is

Stórutunga og gömul rafstöðvarhús í forgrunni. Ljósm.: Trausti Dagsson.

Stóratunga: Er gömul eyðijörð, í austanverðum Bárðardal, ca 40 km frá Fosshóli. Ábúendur í Víðikeri tekið húsið á leigu og reka þar gistiaðstöðu.

Nánari upplýsingar í síma 464-3282.

Netfang: pksb@vortex.is

Breiðamýri: Félagsheimili í Reykjadal. Hægt er að fá húsið og aðstöðuna leigða sem svefnpokapláss fyrir hópa yfir sumartímann. Gestir geta fengið aðgang að eldhúsi og góð snyrtiaðstaða er á staðnum.og hafa ýmsir notfært sér það, s.s. harmonikkuunnendur, húsbílaeigendur og þar eru einnig haldin ættarmót, svo dæmi séu tekin. Nánari upplýsingar í símum: 464 3145 og 848 3512. 

Fosshótel Laugum: Fosshótel er rekið í Framhaldsskólanum á Laugum á sumrin. Þar er boðið upp á gistingu í herbergjum með og án baðs. Einnig er boðið upp á svefnpokapláss og tjaldstæði er á staðnum. Á kvöldin er opinn veitingasalur og bar. Sundlaug er á staðnum.

Nánari upplýsingar í síma 464-6300.

Netfang: laugar@fosshotel.is

Heimasíða: www.fosshotel.is

Séð frá Narfastöðum út Reykjadal. Ljósm.: Símon Sverrisson.

Narfastaðir: Glæsileg gistiaðstaða er á Narfastöðum í Reykjadal, ca 5 km suður af Laugum við þjóðveg nr. 1. Boðið er upp á gistingu í 43 herbergjum með og án baðs. Heitur pottur er á staðnum. Á kvöldin er boðið upp á hlaðborð í veitingasalnum fyrir hópa sem og gesti og gangandi á meðan húsrúm leyfir. Þar er einnig bar.

Nánari upplýsingar í síma 464-3300.

Netfang: info@farmhotel.is

Heimasíða: www.farmhotel.is

Ljósvetningabúð: Félagsheimilið Ljósvetningabúð í Kaldakinn er leigt út sem svefnpokapláss fyrir hópa, jafnt sumar sem vetur. Eldhús og öll snyrtiaðstaða er á staðnum og tjaldstæði á sumrin. Tilvalið fyrir ættarmót og stærri hópa, árshátíðir og skemmtanir.

Nánari upplýsingar í síma: 464-3231.

Hraunbær í Aðaldal: .
Húsið stendur á fögrum stað við Laxá í Aðaldal. Vel staðsett til skoðunarferða um Norðurland. Í nágrenni eru Laxárgljúfur, Byggðasafnið á Grenjaðarstað og Aðaldalshraun. Stutt í hvalaskoðun til Húsavíkur. Mývatn 36 km og Ásbyrgi 90 km. Gæsa- og rjúpnaveiði fyrir gesti ef pantað er fyrirfram. Þinghúsið er við veg 845. Næsta þéttbýli/golf: Húsavík 25 km, Akureyri 75. Sundlaug: Laugar 13 km / Heiðarbær 15 km.
Þinghúsið Hraunbær í Aðaldal
641 Húsavík
Sími: 464 3695

thinghus@simnet.is

Þinghúsið Hraunbæ. Ljósmynd Símon Sverrisson

Gisting á neðri hæð íbúðarhússins. Gisting í þremur 2ja manna herbergjum, sameiginlegt baðherbergi, eldhús og setustofa. Inngangur er sameiginlegur með gestgjöfum en önnur aðstaða er aðskilin frá heimilinu. Afþreyingarmöguleikar í boði eru styttri hestaferðir, m.a. er leitt undir börn á hestbaki. Einnig er góð aðstaða til fuglaskoðunar. Góð staðsetning fyrir skoðunarferðir á Norðurlandi, þ.e. Mývatn, Goðafoss, Jökulsárgljúfur, Dettifoss og Ásbyrgi. Stutt frá er safnið á Grenjaðarstöðum. Garður er við veg 845.  Opið allt árið.
Búskapur: Hestar, kálfar og kettir. Verslun/golf/hvalaskoðun: Húsavík 20 km. Sundlaug Heiðarbær 12 km.
Telefonnummer: 00354 - 464-3569
email: gaestehaus-gardur@hotmail.com

Internet: http://www.gardur.de

Neskirkja

Nes í Aðaldal. Neskirkja er í Grenjaðarstaðaprestakalli í Þingeyjarprófastsdæmi. Nes er bær, kirkjustaður og fyrrum prestssetur í Aðaldal. Prestakallið var lagt niður 1860 og sóknin lögð til Múla en nú er Nes útkirkjustaður frá Grenjaðarstað. Katólskar kirkjur í Nesi voru helgaðar heilagri Ceciliu.

Turnlaussa timburkirkjan, sem nú stendur, var byggð 1903. Eiríkur Þorbergsson í Húsavík var yfirsmiður. Söngloft er í vesturenda, þvert yfir kirkjuna og svalir að norðan og sunnan. Klukknaportið er áfast vesturgafli. Kirkjan var stækkuð og endurbætt árið 1977, forkirkja reist og kór byggður.

Gréta og Jón Björnsson máluðu og skreyttu kirkjuna. Eyjólfur Eyfells málaði altaristöfluna og Hannes og Kristján Vigfússynir gerðu skírnarsáinn 1980.

Verið er að vinna enn að viðbót við þessa. hae.