Sveitarfélagið Þingeyjarsveit
Sveitarfélagið Þingeyjarsveit varð til við sameiningu Bárðdælahrepps, Hálshrepps, Ljósavatnshrepps og Reykdælahrepps árið 2002. Síðan stækkaði sameiningin 2008 þegar Aðaldælahreppur og Þingeyjarsveit sameinuðust. Sveitarfélagið hélt nafninu Þingeyjarsveit.
Áður hafa orðið sameiningar og skiptingar á sveitarfélögum á þessu svæði. Helgastaðahreppur var til fram undir aldamótin 1900 en skiptist þá í Aðaldælahrepp og Reykdælahrepp. Ljósavatnshreppur náði yfir allan Bárðardal en hreppnum var skipt árið 1907 í Bárðdælahrepp og Ljósavatnshrepp. Hálshreppur náði allt til og með Flateyjar en 1907 var hreppnum skipt í Hálshrepp og Flateyjarhrepp og voru hreppamörkin við Eyvindará á Flateyjardal. Árið 1967 fluttu síðustu ábúendur í Flatey í land en rúmum áratug fyrr voru býlin á Flateyjardalnum farin í eyði eða 1953. Árið 1972 var Flateyjarhreppur aftur sameinaður Hálshreppi. Þingeyjarsveit er landfræðilega stórt sveitarfélag, allt frá Flatey suður undir Vatnajökul. Byggðin hefur dregist saman en auk þess sem byggð var í Flatey og Flateyjardalsheiði þá voru býli á Flateyjardalsheiði og í Náttfaravíkum. Einnig voru býli á Fljótheiði og suður af Reykjadal, langt suður af Bárardal og í dölunum fram af Fnjóskadal, Hjaltadal, Timburvalladal og Bleiksmýrardal´. En byggðin hefur líka orðið þéttari á nokkrum stötðum og nýbýli verið byggð út úr stærri jörðum. Mesta þéttbýlið er á Laugum, þá eru þéttbýliskjarnar við Stórutjarnaskóla, Hafralækjarskóla og Laxárvirkjun.
Áður en til sameiningar kom 2002 voru almennt 5 manna sveitarstjónir í sveitarfélögunum og oddviti sveitarstjónar fór með framkvæmdastjórn. Í sveitarstjórn Þingeyjarsveitar sitja nú 7 manns og 7 til vara. Margar nefndir eru á vegum sveitarfélagins, auk sameiginlegra nefnda vegna samvinnu við nágrannasveitarfélögin. Skrifstofa sveitarfélagsins er í Kjarna á Laugum í Reykjadal þar starfa auk sveitarstjóra 7 mann í heilu og/eða hlutastarfi. Sveitarstjórnarfundir eru oftast 2 í mánuði en það er þó ögn breytilegt eftir aðstæðum og þörf hverju sinni.