Handverkskonur milli heiða
Goðafossmarkaður Fosshól   Þingeyjarsveit  S: 461-3323	Opnunartími:  Sumar : Alla daga frá 9:00-19:00. S: 464-3323  Vetur : Í samfloti við Goðafossverslun. S: 464-3261

           Félagið Handverkskonur milli heiða var stofnað þann 18. mars  árið 1992. Tilgangur félagsins var og er að bæta atvinnumöguleika kvenna og auka tekjur með því að konur geti selt heimaunna framleiðslu sína heimamönnum og ferðafólki.

Í upphafi saman stóð félagið af konum sem búsettar voru á milli tveggja heiða sem ramma inn starfsvæðið.
Vaðlaheiði í vestri og Fljótsheiði í austri og var nafnið dregið af þessari landfræðilegu staðsetningu í Suður- Þingeyjarsýslu.

Félagið teygði anga sína lengra þ.e.a.s. út í Köldukinn og inn í Bárðardal. Á þessum tíma skiptist svæðið niður í: Hálshrepp, Ljósavatnshrepp, Bárðardal og síðan fylgdu með bæir í Reykjadal vestan Fljótsheiðar.
Þingeyjarsveit er nú heimaland Handverkskvenna milli heiða, en Þingeyjarsveit varð til við sameiningu hinna þriggja fyrrnefndu hreppa 2002 ásamt Reykdælahreppi og eru íbúar á þessu svæði u.þ.b. sjöhundruð talsins.

Handverkskonur milli heiða hafa frá árinu 1992 rekið litla verslun á Fosshóli við Goðafoss.
Handunnar vörur eru þar til sölu bæði úr lopa og öðrum efnivið. Lögð er áhersla á framleiðslu úr íslensku hráefni og einnig unnið úr aðkeyptu efni.
Lopapeysan hefur alltaf verið áberandi bæði í hefðbundnar lopapeysur og sérprjónaðar, munstur og snið oft á tíðum
hönnuð af þeim sem prjóna flíkurnar.
Einnig er mikið úrval af handprjónuðum húfum, vettlingum, sokkum, hyrnum og prjónuðum undirfötum bæði á börn og fullorðna.
Muni úr hornum og beinum er líka að finna í versluninni, þar ber mikið á fagurlega unnum skeftum sem prýða eldhúsáhöld, skartgripi og tölur.

Gler og grjót er mikið notað og munir unnir úr þessum efnum, einnig finnast þar grös, te og krydd úr íslenskum jurtum tíndum á þingeyskum heimalöndum og heiðum.

Jólamarkaður er fyrir jólin, handverkskonur koma  þá með vörur sem tengdar eru jólunum og fæst þá oft eitthvað matarkyns eins og sultur og heimagert konfekt.

En sjón er sögu ríkari og því tilvalið að staldra við ef leið liggur um Þingeyjarsveit.

Goðafossmarkaður er nú opinn allt árið um kring, á sumrin er opið frá morgni til kvölds en yfir vetrartímann er opið í samfloti við Goðafossverslun.

                      

 

            

        

    

      Myndataka og myndvinnsla: Heiðrún Tryggvadóttir / Kristín María Hreinsdóttir.
      Uppsetning og vinnsla á vef: Kristín María Hreinsdóttir.
      Heimilidir: Goðafossmarkaður. Fundagerðir 1992-2005.